Madaxweynaha oo tacsi u diray Shacbiga Somaliland iyo ehelada Marxuum Xuseen Doodi oo ku geeriyooday Magaalada Hargeysa
TACSI MADAXWEYNE: 04/08/2019
INNAA LILLAAHI WA INNAA ILAYHI RAAJICUUN
Madaxweynaha Jamhuuriyadda Somaliland, Mudane Muuse Biixi Cabdi, isagoo ku hadlaya magaciisa, ka dawladda iyo ka shacbiga Somaliland, waxa uu dhambaal tacsi ah u dirayaa, waxgaradka, waayeelka, aqoonyahanka, qoyska, ehelada, qaraabada, asxaabta iyo shacbiga Somaliland ee uu ka baxay Alle ha u naxariistee Marxuum Xuseen Xaaji Faarax Maxamed (Xuseen Doodi) oo ku geeriyooday maanta oo ay taariikhdu tahay 04/08/2019, magaalada Hargeysa.
Madaxweynuhu waxa uu marxuumka ku sifeeyey siyaasi ka baxay qaranka Somaliland door muhiimana ka soo qaatay nabadayntii iyo dib u dhiskii dalka, isagoo xilal kala duwana qaranka ka soo qabtay oo uu ugu danbeeyey xilka wasiirka wasaaradda maaliyada Somaliland.
Waxaanu Madaxweynuhu marxuumka ALLE uga baryayaa inuu naxariistii janno ka waraabiyo, waxgaradka, waayeelka, aqoonyahanka, qoyska, ehelada, qaraabada, asxaabta iyo shacbiga Somaliland ee uu ka baxayna samir iyo iimaan saadiqa ka siiyo.
ALLAA MAHAD LEH
Maxamuud Warsame Jaamac
Af-hayeenka Madaxweynaha JSL.
